Məhəllə marketlər

Balaca, xudmani məhlə marketləri olur. İki otaqlı evin kuxnası böyüklükdə olanlardan. 45-50 yaş arası təxmini adı Rafət olan nurani dayı işlədir adətən elə marketləri. İçəri iki nəfər müştəri girəndə uje dəbərmək olmur. Rafət dayı çıxır çölə ki, bunlar rahat alış-veriş eləsinlər. Reski içəridən bir xala çağırır ki, ay Rafət süd bu gün gələndi?

Marketin adı “Halal Market” olur çox vaxt. Qulpu xarab olub aşağı sallanan plastik qapısı da öz yerində. Qapını bağlamaq üçün möhkəm çırpmaq lazımdı. Qapının üstündə yanıb-sönən “AÇIQDIR OPEN ОТКРЫТО” yazılı lövhə, o lövhənin aşağısında da çoxdan köhnəlib saralmış A4 kağızında yazılmış “SATIŞDA KONTUR VAR” yazısı. Qapıda kolanın reklamı olan plakat olur, düz iki ildi ordadı, kolanın o buraxılışı uje istehsal olunmur. İçəri girən kimi sağ tərəfdə üst-üstə kukruzlar yığılıb. Həmişə kiminsə bilmədən ayağı ilişib aşırdır onları…

Səhərlər marketə girəndə görürsən Rafətin yoldaşı Rəsmiyyə xala da ordadı, elə yuxudan duran kimi yaşıl, qaroşkalı xalatını geyinib düşüb marketə yoldaşına kömək eləməyə. Gələn çörəklərin üstünü gəlinliyində gətirdiyi qırağı saçaqlı, rozıvı adyalla örtür. Çörəklər axşama kimi yumşaq qalır, həm də böyük marketdəki çörəklərdən dadlı olur sanki o adyalın altındakı çörəklər. Nədirsə o rozıvı adyalın hikmətidir…

Stolun üstündə uzun 100 vərəqli okul dəftəri olur, üstünə də “нисйе дефтери” yazılıb. Vərəqlərini sağa-sola çevirməkdən burulub. Yanında da balaca televizor damaşnı antenaynan, bir qulağı sınmış vəziyyətdə. Televizorda da aztv göstərir, səhər xəbərlərindəki aparıcı Almaniyada tələbələrin üç aydır təqaüdlərini ala bilmədiyini deyir…