Qış günündə kombinin xarab olması

#Buhavalarda Yeni Yasamalda yaşayan Ağasəfin 10-cu sinifdə oxuyan oğlu Cavidanın ad günüdür deyə axşam gələcək qonaqların qabağına çıxmaq üçün güclü hazırlıq gedir.

“Qışda, özü də bu qarlı havada hinduşkanı hamı bəyənəcək” deyə dodaqaltı danışan Cavidanın anası Mehriban salat üçün göyərtini doğrayır. Bu vaxt sabah sevgilisi ilə görüşə hazırlaşan 20 yaşlı qızı Solmaz hamamdan anasını çağırır ki, duşdan isti su kəsildi, başım şampunlu qaldı, donuram.

Mehriban kuxnada da isti suyun gəlmədiyini görüb ərinə deyir. Ağasəf də nə illah edirsə, kombini düzəldə bilmir.

Mehriban təşvişə düşür, ərini də tələsdirir ki, tez bir çarə tap. Nə qədər söndürüb yandırırsa da, kombi apparatı düzəlmək bilmir. Ağasəf kombi ustası Fərhadın nömrəsini qonşudan alıb zəng edir. Fərhad da deyir ki, bugün zakazlarım çoxdur, yol da uzaqdır, qoy sabah gəlib düzəldərəm. Əslində heç Fərhadın sifarişi çox deyil, sadəcə bilir ki, bu qarlı havada qiyməti yuxarı qaldırmaq üçün bəhanə uydurmalıdır.

Ağasəf xahiş-minnət edir ki, o biri zakazları sonraya saxla, birinci gəl mənim işimi həll et. Fərhaddan xərcini soruşanda o da 150 manat deyir, Ağasəfin gözü kəlləsinə çıxır. Tezbazar sağollaşıb Mehribana deyir ki, dayınəvəsinin də az-çox başı çıxır kombidən, sabaha gəlib pulsuz düzəldər. Arvadı Mehriban qalmaqal salır ki, “bəs axşam qonaqlar gələndə evdə paltoda-kurtkada otursun? Uşağın ad gününü niyə burnundan gətirirsən?” Qızı da ordan hamamdan çıxıb deyir ki, neçə gündür çimmirəm, saçım pis gündədir, mən qonaqların qabağına çıxmayacam. Arvadı Mehriban “qab-qaşığı soyuq suda necə yuyacam?” deyə qışqıranda Ağasəf başa düşür ki, vəziyyət doğurdan da gərgindir, mütləq bugünə kombi düzəlməlidir. Usta Fərhada zəng edib onu gəlməyə razı salır, dönə-dönə xahiş edir ki, bir az tez gəl.

Ağasəf axşam qonaqlıq üçün marketdən kompot, limonad alıb geri qayıdandan heç 5 dəqiqə keçməmiş isti su gəlməyə başlayır. Kombinin üstündəki error-lar da itir. “Yenə qazın davleniyası aşağı düşübmüş” fikrini ağlından keçirdə-keçirdə ustaya zəng edir. Fərhad da deyir ki, 2 dəqiqəyə qalxıram yuxarı, kombi apparatınızın içindəki ərpi təmizləmək üçün mağazadan kislota alıram.